Paul Pogba është pezulluar nga futbolli për 4 vite pasi rezultoi pozitiv në testin anti-doping. Një lajm tepër i keq për mesfushorin francez, pasi karriera e tij mund të quhet e mbyllur.
Gjykata Kombëtare Anti-Doping pranoi plotësisht kërkesat e prokurorit.
30-vjeçari u gjet pozitiv për një metabolit të testosteronit në një test pas ndeshjes Udinese-Juventus më 20 gusht dhe më pas u pezullua si masë paraprake.
Dënimi mund të apelohet në CAS. Pak orë pas skualifikimit 4-vjeçar për doping, Paul Pogba theu heshtjen. E bëri këtë duke përsëritur pafajësinë e tij dhe duke njoftuar se do të vazhdojë të mbrohet.
“Sot u informova për vendimin e Gjykatës Kombëtare Antidoping dhe besoj se vendimi është i gabuar. Jam i trishtuar, i tronditur dhe zemërthyer. Gjithçka që kam ndërtuar në karrierën time si lojtar profesionist më është hequr. Kur të jem i lirë nga kufizimet ligjore, e gjithë historia do të jetë e qartë, por unë kurrë nuk kam marrë me vetëdije apo qëllimisht suplemente që shkelin rregullat antidoping”, tha mesfushori francez.
“Si një sportist profesionist nuk do të bëja kurrë asgjë për të përmirësuar performancën time duke përdorur substanca të ndaluara dhe nuk kam respektuar apo mashtruar kurrë sportistë dhe tifozë të tjerë të ndonjë prej skuadrave ku kam luajtur. Si rezultat, vendimin e sotëm do ta apeloj në Gjykatën e Arbitrazhit Sportiv”, theksoi francezi.
