Nuk është përrallë, por historia e një sulmuesi të madh, që është kthyer duke bërë atë që di më mirë: të shënojë gola me peshë. Sebastien Haller është pa dyshim heroi kombëtar i Bregut të Fildishtë, triumfues në Kupën e Kombeve të Afrikës (mposhti Nigerinë 2-1 me përmbysje).
Sulmuesi i Borussias së Dortmund ka pasur një natë ëndrrash. Të gjitha vetëm pak muaj pasi kaloi makthin më të keq të jetës.
Haller sapo kishte mbërritur në Gjermani zbuloi diagnozën e pamëshirshme: kancer në testikuj. Sulmuesi u detyrua të ndalej për të luftuar betejën më të rëndësishme të jetës së tij, atë kundër kancerit.
Një betejë e vështirë, që e pa atë të operohej dy herë dhe të përballej me katër cikle kimioterapie, përpara se të mund të kthehej në fushë. Pasi u kthye në fushë, Haller përjetoi një tjetër makth, megjithëse vetëm në nivel sportiv, sezonin e kaluar.
Në fakt, gabimi i tij nga penalltia në raundin e fundit të Bundesligës i kushtoi titullin Borussias. Një gabim i bujshëm, duke qenë se penalltia e fundit e humbur nga Haller më parë datonte në vitin 2017. Këtë sezon, Haller ka luajtur vetëm 13 ndeshje për Dortmundin midis Bundesligës dhe Champions League, pa shënuar asnjë gol.
Nuk ishte mënyra më e mirë për të përballuar Kupën e Kombeve të Afrikës në shtëpi. Haller nuk u shfaq në formën e tij më të mirë as në Kupën e Kombeve të Afrikës, duke munguar në tri ndeshjet e para të fazës së grupeve për shkak të dëmtimit.
Prandaj, debutimi i tij erdhi vetëm në 1/8 finale, por sulmuesi i Borussias praktikisht nuk u pa deri në gjysmëfinale. Pra, këtu erdhi goli i tij vendimtar kundër Kongos dhe ai shumë i rëndësishëm në finale, kur gjuajtja e tij plot klas i lejoi Bregut të Fildishtë të përmbysë Nigerinë dhe të fitojë një trofe pothuajse të papritur.
Nga ana tjetër, karriera e Hallerit tashmë është plot me rekorde. Sulmuesi i Bregut të Fildishtë, për shembull, ishte lojtari i parë që shënoi në gjashtë paraqitjet e tij të para në Ligën e Kampionëve, si dhe lojtari më i shpejtë që arriti 10 gola në Champions League, në vetëm 6 ndeshje.
Për më tepër, Haller është një nga dy lojtarët që ka shënuar më shumë se 4 gola në debutimin e tij në Champions League, së bashku me Marco van Basten.
