Alma Tandili, kryetarja e Agjencisë Shtetërore për të Drejtat dhe Mbrojtjen e Fëmijëve, ka zbuluar detaje të reja në lidhje me Jetnor Zhabolit, 35-vjeçarit që mbante të izoluar gruan, nënën dhe dy fëmijët e tij të mitur në shtëpi, ndërsa i monitoronte me kamera.
E ftuar në Euronws Albania, ajo theksoi se rasti është kuptuar që në dhjetor, pasi vajza në moshën 9-vjeçare nuk po frekuentonte shkollën. Ajo nënvizoi se i kanë marrë disa herë prindërit në telefon por nuk janë përgjigjur. Pikërisht kjo gjë e shtyu policinë që të ndërhynte me forcë në banesë.
“Ky rast është kuptuar që në dhjetor, në shkollë, nga mosfrekuentimi i vajzës që ka shkëputur totalisht kontaktet. Stafi psikologët e kanë pasur të pamundur të komunikojnë me prindërit e vajzës pasi nuk e hapnin telefonin. Janë kërkuar shpesh në mbledhje dhe asnjë nuk ishte i pranishëm. Çdo gjë ishte vënë re. Ka qenë një telefonatë e një qytetari pranë policisë. Policia ka qenë shumë e angazhuar kohët e fundit. Policia nuk ka shkuar e vetme. Janë tre fëmijë. E parë nga kjo dhe policia nuk mundi të ndërhyjë e vetme por kërkuan ndihmën e psikologut. Është dashur të shkojmë në familje dhe të hyjmë me forcë”-tha ajo.
Tandili tha se 35-vjeçari ishte një person me influencë në familje pasi siguronte goxha të ardhura. Ajo tha se dhuna psikologjike kishte vite që ndodhte, por izolimi total i bashkëshortes, fëmijëve të mitur dhe nënës, ndodhi vetëm gjatë kohëve të fundit.
“Fëmijët janë gjetur në gjendje të traumatizuar, vetëm nëna është shprehur. Pastaj më vonë janë pyetur fëmijët. Janë lënë të qetë dhe janë ripoyetur më vonë. Kemi të bëjmë me një rast shumë të rëndë traumatik që i kalon limitet. Sipas dëshmive kishin vite që ishin dhunuar psikologjikisht dhe fizikisht, por muajt e fundit ishte bërë izolimi total me jashtë. Sa më shumë rëndohej gjendja e personit aq më shumë shtohej mbikqyrja. Jo vetëm këto familje nuk e kanë denoncuar, por kemi dhe shumë të tjera që nuk i denoncojnë. Kemi të bëjmë me një person që ka pasur influencë në familje dhe kishte goxha të ardhura ekonomike dhe kanë qenë të gjithë nën presionin e tij. Ne kemi komunikuar dhe me shkollën dhe shumë pak kanë vënë re që kishin probleme të tilla. Shpeshherë fëmijët për shkak të presioneve të rënda në psikologjike janë aq të manipulueshëm sa kur futen në ambientet e shkollës tjetërsohen sepse përdorin mekanizma mbrojtës për familjen. Fëmijët asnjëherë nuk e denoncojnë familjen dhe kur ajo është negative, por vetëm e justifikojnë atë.”, tha ajo.
