Të paktën 30 persona janë vrarë dhe disa janë plagosur në një seri sulmesh në shtetin Plateau të Nigerisë qendrore, pavarësisht se qeveria vendosi një shtetrrethim të martën, tha Joseph Gwankat, kreu i grupit të komunitetit Mwaghavul Development Association (MDA).
Në sulmet në afërsi të qytetit të Mangu, të cilat zgjatën për dy ditë, sulmuesit synuan disa fshatra të vendosura në kufirin e Mangu dhe zonën e qeverisjes lokale Barkin Ladi, vuri në dukje Gwankat.
“Viktimat kërkuan strehim në shtëpinë e një udhëheqësi të komunitetit, pas trazirave të mëparshme në qytetin e Mangu. Sulmuesit rrethuan shtëpinë dhe vranë ata që ishin brenda”, i tha Gwankat Reuters me telefon.
Të mbijetuarit thanë se personat e armatosur qëlluan rastësisht drejt njerëzve, duke përfshirë gra dhe fëmijë, dhe u vunë flakën shtëpive dhe pronave.
Sulmet mes fermerëve dhe barinjve dhe përleshjet ndërkomunale janë në rritje në Nigerinë qendrore, një zonë e larmishme etnike dhe fetare e njohur si ‘Rripi i Mesëm’, ku një cikël dhune ka marrë qindra jetë në vitet e fundit.
MDA fajësoi barinjtë për sulmin e fundit. Në sulmin e mëparshëm në Nigeri, në ditën e Krishtlindjes, në fund të dhjetorit të vitit të kaluar, u vranë 140 persona.
