Rikthimet janë gjithmonë të bukura. Javier Chicharito Hernandez ka nënshkruar me Chivas Guadalajara, duke u kthyer kështu te skuadra meksikane pas 13 vitesh. Pasi përfundoi aventura e tij me LA Galaxy, ai vendosi të mos rinovojë dhe të kthehet në vendlindje.
“Javier Chicharito Hernández kthehet në ekipin e zemrës së tij. Jemi të bindur se dashuria e tij për klubin, përvoja e fituar gjatë karrierës së tij të suksesshme dhe shpirti i tij do të reflektohen në këtë fazë të re me Chivas” – Shkruan klubi. 35-vjeçari mund të debutojë me skuadrën e re me 27 janar, në ndeshjen e kampionatit meksikan ndaj Club Tijuana.
Sa i takon arritjeve, ai u bë kampion në vitin 2006 në kampionatin meksikan me Chivas, numëron 2 tituj të Premier League (2010-2011 dhe 2012-2013) dhe 3 Community Shield (2010, 2011 dhe 2013), me Manchester United. Chicharito ka luajtur 617 zyrtare dhe ka realizuar 258 gola.
Vlen të theksohet se aftësitë e Chicharitos ranë në sy pikërisht te Chivas, për t’u transferuar më pas në Manchester United. Pjesa tjetër, është histori…
