Moti i keq me erë të fortë ka shembur fasadën e një pallati 5-katësh në Milot, në bashkinë e Kurbinit. Pallati ishte restauruar pak muaj më parë si pjesë e programit të Rindërtimit nga tërmeti i vitit 2019.
Fatmirësisht nuk raportohet për persona të lënduar.
Deputeti demokrat, Kastriot Piroli, shprehet se “kjo është një dëshmi e korrupsionit dhe babëzisë së kryebashkiakes së Kurbinit”.
Sipas tij miliona euro të hedhura në Kurbin pas tërmetit të 2019-ës dhe fasadat që shemben janë një standart punimesh i përdorur në të gjithë fasadat e pallateve në qytet.
“Dëshmia e korrupsionit dhe babëzisë së kryetares së Bashkisë Kurbin. Miliona euro të hedhura në Kurbin që pas termetit të nëntorit të 2019 dhe fasadat që shemben duke rrezikuar jetën e banorëve të qytetit të Milotit. Ky standart dhe cilësi punimesh është përdorur në të gjitha fasadat e pallateve në Kurbin. I bëj thirrje SPAK të nise hetime të menjëhershme”, shkruan deputeti.
