Deputeti i PD-së, Ferdinand Xhaferri ka komentuar situatën e tensionuar të regjistruar këtë të mërkurë në Komisionin e Edukimit ku Gazment Bardhi dhe Flamur Noka u përplasën me dy deputetet e Bashës, Flutura Açkën dhe Merita Bakiun, në tentativë për të moslejuar zhvillimin normal të komisionit.
I ftuar në A2 CNN, Ferdinand Xhaferri u shpreh për kolegen e tij Flutura Açka se pa e kuptuar bëri rolin e deputetit socialist Erion Braçe. Ai tha më tej se Bardhi dhe Noka janë aty për mohimin e ngritjes së komisioneve hetimore, për vrasjen e rolit të opozitës në Kuvend, dhe se do të vazhdojnë aksionin deri sa t’i kthehen të drejtat opozitës.
“Sot, pa e kuptuar, vendosi të bënte edhe punën, edhe rolin e Erion Braçes. Nuk ishte e pëlqyeshme ajo që ndodhi, por Bardhi dhe Noka janë aty për mohimin e ngritjes së komisioneve hetimore, për vrasjen e rolit të opozitës në Parlament dhe prandaj do të vazhdojmë të jemi aty për të mos lejuar mbajtjen e aktiviteteve parlamentare, derisa t’i kthehen të drejtat opozitës. Ajo që ndodhi sot ka të bëjë me sistemin që ka ngritur Edi Rama, që për mua është liberalizim taktik, ku opozita duhet të lëvizë sipas hapësirës që krijon Edi Rama; ku shoqëria civile është e lirë derisa nuk rrezikon pushtetin e tij”, – deklaroi Xhaferri.
