Një gazetar i Al Jazeera humbi jetën pasi u plagos rëndë gjatë një sulmi izraelit në Gazën jugore dhe më pas u detyrua të priste pesë orë për ndihmë mjekësore. Operatori Samer Abu Daqqa vdiq nga plagët e marra në sulm, konfirmoi edhe Al Jazeera duke shtuar se ai kishte gjakderdhje për orë të tëra përpara se personeli mjekësor të arrinte tek ai për shkak të granatimeve të rënda në qytet.
Korrespondenti i Al Jazeera dhe shefi i zyrës së Gazës Wael Dahdouh u plagos gjithashtu në sulm. Ky i fundit humbi djalin e tij dy javë më parë nga sulmet izraelite ndërsa në muajin tetor humbi bashkëshortën, dy fëmijët dhe nipin një vjeç.
Rrjeti mediatik i Al Jazeera akuzoi Izraelin për shënjestrimin dhe vrasjen sistematike të gazetarëve të Al Jazeera dhe familjeve të tyre. Një deklaratë, ai bëri thirrje komunitetit ndërkombëtar që të ndërmarrë veprim të menjëhershëm për të mbajtur përgjegjës qeverinë dhe ushtrinë izraelite. IDF hodhi poshtë akuzat e rrjetit mediak, duke u shprehur se kurrë nuk ka shënjestruar dhe kurrë nuk do të synojë qëllimisht gazetarët, por duke pasur parasysh shkëmbimet e vazhdueshme të zjarrit, qëndrimi në një zonë luftarake aktive ka rreziqe të qenësishme.
