Ish-ministri i Shëndtësisë, Ilir Beqaj u paraqit këtë të premte në SPAK si person nën hetim për çështjen e sterilizimit. Pas daljes nga SPAK ai foli për mediat ndërsa shpjegoi se për çfarë çështjesh ishte pyetur këtë të premte.
“Edhe sot paraqita në SPAK në cilësinë e personit nën hetim për çështjen e sterilizimit. U mora në pyetje, unë kam qenë dhe do të vazhdoj të jem në dispozicion. Sot diskutuam edhe për gazin edhe për aneksin 8. Për këtë të fundit në pjesën më të madhe se ai lidhet me këtë çështje dhe aneksi është pjesë e dokumenteve standarde të tenderit të sterilizimit të listës së investimeve që duhet të bëjnë operatorët, që pastaj është bërë pjesë e ofertës e më pas edhe e kontratës. Ndërkohë siç mund ta shikoni edhe sot kam ardhur me ndihmën e avokatit, me automjetin e famshëm”, tha ish-ministri.
Ish-ministri po hetohet nën masën e sigurisë detyrim paraqitje në procedimin penal për koncesionin e sterilizimit. Ai akuzohet nga SPAK për shpërdorim detyre, ndërkohë në vendimin për masën e sigurisë ndaj ministrit, GJKKO ka shprehur bindjen se Beqaj duhet të vihet nën akuzë edhe për veprën penale të falsifikimit të vulave, stampave dhe formularëve. Sipas gjykatës, Beqaj është personi kyç në kryerjen e procedurave në koncesionin e sterilizimit të seteve kirurgjikale, vlera e të cilit është fryrë artificialisht.
Gjykata e Posaçme kundër Krimit të Organizuar dhe Korrupsionit kërkoi ndërprerjen e koncesionit të sterilizimit para afatit, për shkak të problematikave dhe shkeljeve të evidentuara, megjithatë koncesioni është mbrojtur nga kryeministri Edi Rama dhe ministri Beqaj, i cili pretendon pafajësi.
Lidhur me çështjen, janë arrestuar biznesmeni Ilir Rrapaj – aksioneri kryesor në “SaniService”, kompania që ka lidhur kontratën koncesionare me MSH dhe ish-ministri i Shëndetësisë, Klodian Rrjepaj. Masa më të buta janë dhënë për gjashtë anëtarët e komisionit të dhënies së koncesionit.
