Forca të shumta Policia kanë blinduar qytetin e Vlorës, pasi Sokol Sinomati ka marrë leje nga burgu për të marr pjesë në varrimin e djalit të tij, 23-vjeçarit Gëzim Sinomati, i cili u ekzekutua me snajper mbrëmjen e 7 Janarit në ballkonin e banesës së tij.
Mësohet se janë angazhuar rreth 100 forca policie për të ruajtur sigurinë e Sokol Sinomati, i njohur me nofkën “buzëderri”. Lamtumira e fundit ishte planifikuar që ti jepej të riut sot në orën 11:00.
Dyshohet se Gëzim Sinomati u ekzekutua për veprimtarinë kriminale të babait të tij, Sokol Sinomati, i cili ka qenë anëtar i bandës së “Gaxhait” në qytetin bregdetar.
I riu u qëllua me snajper teksa ishte në ballkonin e banesës ku kishte dalë për të pirë cigare, nga një makinë tip “BMW X3” e vjedhur me targa të dubluara. Gëzim Sinomati është qëlluar nga sedilja e pasme e makinës në një distancë prej 35-40 m. Burime bëjnë me dije se në pjesën e pasme të makinës që u përdor nga atentatorët dhe që u gjet e djegur, është gjetur një bllok betoni, që ishte modifikuar në sediljen e pasme për të qëndruar qitësi.
Grupi hetimor dyshon se kemi të bëjmë me një qitës profesionist dhe vrasës me pagesë. Blloku i betonit ka shërbyer për të mbështetur armën në mënyrë që mos të ketë tronditje dhe të mos gaboi. Arma nuk është gjetur dhe as gëzhoja deri në këto momente.
