Seriali i famshëm “Peaky Blinders” shumë shpejt do të bëhet film. Krijuesi i “Peaky Blinders”, Steven Knight konfirmon se ekziston vërtet skenari për film të “Peaky Blinders”, ndërkohë që ai po punon gjithashtu edhe për filmin “Star Ëars”.
Knight bën me dije se ai pothuajse e ka mbaruar skenarin e filmit që në njëfarë mënyre është vijueshmëri e serialit, që për gati një dekadë solli historinë e bandave të gangsterëve britanikë pas Luftës së Parë Botërore.
Në një bisedë me “Radio Times”, Knight konfirmon se është afër përfundimit të skenarit dhe dëshiron të fillojë së shpejti prodhimin e filmit, ndërsa xhirimet planifikohen të bëhen në mes të këtij viti.
“Për momentin jam duke punuar vetëm në pjesët e fundit të tij. Unë thjesht ulem në tastierë dhe filloj të shkruaj. Për mua është paksa sikur shoh një ëndërr. Ti ulesh aty dhe të gjitha këto gjëra vijnë, dhe pastaj e lexon përsëri atë që ke shkruar dhe mendon: Kjo është shumë mirë – por nga erdhi”.
Cillian Murphy, i cili interpretoi Thomas Shelby përgjatë 10 vjetëve të serialit është shprehur se do të kthehej për të qenë pjesë e filmit, nëse do të kishte një skenar dhe ka akoma histori për t’u treguar.
“Peaky Blinders” ka ardhur për publikun në disa forma, duke përfshirë edhe ato të lojërave të ndryshme, mes të cilave një version VR dhe madje edhe në një balet të titulluar “Shëlbimi i Thomas Shelby”.
Filmi pritet të vendosë ngjarjet e tij gjatë Luftës së Dytë Botërore dhe Knight ka thënë se do të jetë sa i njëjtë aq edhe ndryshe nga seriali, ndërsa shikuesit duhet të përgatiten për të papritura.
