Këshilltari demokrat në Bashkinë e Tiranës, Ilir Alimehmeti, buxhetin për kryeqytetin prej 33.4 miliardë lekësh e cilëson si të pakonsultuar me njerëzit dhe me forcat politike të pranishme në Këshillin Bashkiak.
Në emisionin “MCN Economy”, deklaroi se është një buxhet ku opozita paraqiti një sërë amendamentesh të cilat nuk u morën parasysh, por se u miratua me forcë kartoni në vetëm 313 sekonda, duke shtuar se aq zgjati mbledhja më e rëndësishme për vitin.
Sipas Alimehmetit, për vitin 2024 rriten taksat për infrastrukturën arsimore, e quajtur si taksë e përkohshme.
“Është një taksë për çmimin e metër katrorë, që nuk zbatohet për 150-160 mijë familje dhe është më e lartë për të gjitha bizneset. Është dhjetëra fish më e lartë. Taksat janë para që merren për tu vënë në shërbim me investime për njerëzit. Buxheti i vitit 2023 është realizuar 64%, ti ke 36% të buxhetit që nuk e ke realizuar për 2023. Pse po i rrit këto taksa, kur edhe këtë buxhet që ke nuk po e shpenzon dot. Pse e mban 1/3? Idealisht do të donim që këto para të shkonin për shërbime për ne, për çerdhe, shërbime publike vendore, për gratë, fëmijët për shpenzimet kapitale. Sa janë realizuar investimet kapitale në 2021, 39%, 2022, 34%, në 2023 nuk kap as 50%. Sepse janë buxhete të pabëra siç duhet, të pa futura në sitë, a realizohet apo jo. Përgjigja është jo. Se është një relacion që u jepet gjithë shqiptarëve. Atëherë pse i taksojmë akoma më shumë, kur bashkia ka nga vitet e mëparshme, për të abuzuar me to. Taksa e ndërtimit është shtuar dhe është zyrtarisht një problem i madh se është zyrtarisht taksë e paqëndrueshme se varet nga humori i tregut imobiliar, hipën, zbret. Ke bërë disa shkolla, por nuk janë bërë as mjaftueshëm dhe as mjaftueshëm shpejt”, tha Alimehmeti.
“Zonat me popullatat më të vjetra kanë më pak fëmijë dhe për këtë duhet një plan. Se nga paratë që shpenzon apo dëshiron të shpenzosh, t’i tregon edhe vizionin tënd. Shpenzimet janë shtuar në tri fusha të vetme, së pari për administratën e bashkisë, e cila është e tejfryrë edhe më shumë se e qeverisë, e cila është rreth 8800 të punësuar. I dyti që shtohet janë shpenzimet për Policinë Bashkiake dhe i treti që shtohet është për inceneratorët, jo për menaxhimin e mbetjeve totale. Ka dhe 17 milionë euro të tjera që shtohet nga viti i kaluar që shkon për djegien e mbetjeve, që ne e dimë që nuk ndodh. Djegësi i Tiranës nuk ekziston fare, pra ku shkojnë këto 17 milionë euro për 2024? Çfarë është ulur? Është ulur mbrojtja për katastrofa si zjarri, është ulur investimi për arsimin bazë dhe janë rritur të vetmet shpenzime që janë abuzive. Këto para merren nga ato para që do përdoren për shërbime. Për mbrojtjen e familjes 10 milionë lekë të reja, për të gjitha bebet e lindura në një vit, 35 milionë lekë. Ndërsa për inceneratorin që nuk ekziston, 17 milionë euro direkt. Kemi një buxhet në mënyrë absolute të pakonsultuar dhe në mënyrë totalitare nuk pranon asnjë amendament”, shtoi ai.
