Në një kohë që janë luajtur 16 javë kampionat, Kategoria Superiore është gjithnjë e më shumë me stadiume të boshatisura. Një braktisje nga tifozët si kurrë më parë, madje edhe të atyre klubeve që historikisht janë mbajtur për një mbështetje të madhe nga sportdashësit.
Kampioni në fuqi, Partizani, u ndoq nga rreth 1 mijë tifozë në takimin e fundit në stadiumin “Arena e Demave” kundër Skënderbeut. Trishtuese ishte pamja e stadiumit “Loro Boriçi” në javën e kaluar, kur në Vllaznia-Dinamo nuk kishte as 300 tifozë. E njëjta gjë edhe në Laç, ku luante Tirana.
Mirëpo, kjo situatë është thuajse e përjavshme dhe duhet pritur një derbi Tirana-Partizani për të parë një stadium që mund t’i 10 mijë të pranishmit. Një situatë e pazakontë, që thuajse vjen me një rënie drastike javë pas jave dhe zbehje totale të interesit nga tifozët.
Faktorët janë të shumta, por mbi të gjitha edhe skema e ndryshuar për skuadrën që në fund fiton titullin. Kjo sigurisht heq efektin e befasisë, pasi çfarëdo që të ndodhë me renditjen, sërish do të ketë “Final 4” për titullin në fund.
SKEMA E RE
Por si do të jetë zyrtarisht “Final 4″ë Pas përfundimit të 4 fazave, skuadrat e renditura në vendet 1, 2, 3 dhe 4 do të zhvillojnë ndeshje “play off” sipas këtij shorti: Në vazon e parë do të jenë ekipet e renditura në vendet 1 dhe 2, ndërsa në vazon e dytë ekipet e renditura në vendet 3 dhe 4.
Ndeshjet do të zhvillohen me një takim në stadiumin “Air Albania”. Në rast barazimi pas 90 minutave të lojës së rregullt, skuadra e renditur më mirë në klasifikim kualifikohet për në ndeshjen finale.
Dy ekipet finaliste do të zhvillojnë ndeshje me një takim në stadiumin “Air Albania” për të përcaktuar ekipin kampion.
Në rast se do të ketë barazim pas 90 minutave të lojës së rregullt do të ketë shtesë 2 x 15 minuta ose penallti. Për të përcaktuar emërtimin e ndeshjes finale “Final 4”, do të hidhet short i lirë.
