Ballkani e ka mbyllur aventurën europiane me humbje 3 me 0 në transfertën e Dinamo Zagreb. Ishin 3 gola nga minuta e 69’ deri në minutën e 78’, që vendosën gjithçka për djemtë e Ilir Dajës.
Suharekasit e mbyllin kështu grupin në vendin e fundit me 4 pikë, po aq sa Astana. Në anën tjetër Dinamo e Zagreb u kualifikua si e dyta e grupit C me 9 pikë. Viktoria Plzen i mori të gjitha pikët e plota.
Pas ndeshjes foli trajneri Ilir Daja.
“Ju falenderoj për opinionin që shprehët sepse kemi bërë një rrugëtim për herë të dytë, jo vetëm për Kosovën po mbarë futbollin shqiptar. Kur ke vazhdimësi që 2 herë titullin kampion, Superkupën dhe prezantohesh në Europë, kemi luajtur përballë me çdo ekip që kemi luajtur. Në raport me kundërshtarët jemi në diferencë në çdo drejtim.
Kemi rritur pritshmërinë sepse të luash në fushën e Dinamo Zagreb kur janë mundur ekipe me nivel. Ne kemi 1 fitore me Dinamon dhe 1 humbje, kemi rritur pritshmëritë dhe kjo është gjë pozitive.
Sigurisht që dalja e Gripshit dhe mosprezenca e Kryeziut, janë 2 lojtarë që në fazën e sulmit bëjnë diferencën te ekipi jonë. Në goditje standarde që nuk duhet ta pranonim e para si korne por dhe e dyta që janë fotokopje të ndeshjeve të fundit, që e pësojmë në të njëjtin vend. Problem që duhet rregulluar. Duke qenë që na duhej fitorja, në ato momente ekipi shthuret.
Janë 2 ndeshje, s’po them me Astanën në Prishtinë. Po e lë atë dhe në thonjza, nëse do bënim gol me Astanën atje dhe në kthim te “Air Albania” me Viktoria Plzen, të kishim Kryeziun, do kishim bërë më mirë seç kemi bërë. Realisht kemi bërë rrugëtim të çmendur.
Po i afrohemi ndeshjes së 30 këtë sezon, që nga korriku për këto 4 muaj. Kemi bërë kampionat dhe sigurisht do ndjehet lodhja. Pinari duhet ta dijë mirë sepse është specialist i fushës, duke mos pasur kontigjentin që kanë të tjerët. Do jetë lodhja fizike, qoftë dhe mentale”, u shpreh Ilir Daja.
