Arsenal ka fituar mbrëmjen e sotme me shifrat e thella 6-0 ndaj Lens. “Topçinjtë” nuk e kanë diskutuar në asnjë moment takimin, duke menaxhuar totalisht 90 minutat.
Arsenal siguron kështu kualifikimin dhe vendin e parë me 12 pikë në grupin B, 4 më shumë se PSV.
Në grupin C, Real Madrid ka marrë një fitore fantastike ndaj Napolit me rezultatin 4-2. Pjesa e parë u mbyll me shifrat 2-1 për spanjollët, ndërsa në të dytën barazuan italianët në mënyrë provizore.
Më pas, në minutën e 83’, Reali shënoi golin e tretë falë supergolit të Paz dhe në të 94-n golin e katërt me Joselu. Me këtë rezultat, Real Madrid siguron vendin e parë me 15 pikë, ndërsa Napoli pret sfidën e fundit për kualifikimin.
Në grupin D, Interi i kualifikuar (11 pikë) u duk sikur kishte ardhur thjeshtë për shëtitje në Portugali. Një barazim 3-3 me Benficën, në një sfidë ku skuadra nga Milano ishte në disavantazh të 3 golave.
Ish-i i zikaltërve Joao Mario ishte i papërmbajtshëm, duke kompletuar hatt-trick për 35 minuta lojë.
Goli i dytë i pësuar nga skuadra e Inzaghit, erdhi pas një gabimi të Asllanit. Interi u zgjua në pjesën e dytë, duke ngushtuar llogaritë me Arnautovic dhe Frattesi, përpara se Sanchez të barazonte shifrat.
Në takimin tjetër, barazim pa gola mes Salzburg dhe Sociedad.
