Një plagosje me armë zjarri ka ndodhur paraditen e sotme në Lezhë. Tonin Ndreca, 35 vjeç, shofer furgoni, është lënduar. Gjendja e tij vlerësohet jashtë rrezikut për jetën. Autori i dyshuar Marjan Kola është shpallur në kërkim. Dyshohet se ngjarja ka ndodhur në vazhdën e një konflikti për një vend parkimi.
“Rreth orës 11:00, në qytet Lezhë, në afërsi të shinave të trenit, gjatë një konflikti të çastit që dyshohet për parkimin e automjeteve, shtetasi M.K. banues në Kurbin, ka plagosur me armë zjarri shtetasin T.N. 35 vjeç, banues në Laç, i cili ndodhet në spital jashtë rrezikut për jetën”, njoftoi policia.
“Autori i dyshuar është larguar menjëherë pas ngjarjes dhe vijon ndjekja nga ana e shërbimeve të Policisë për lokalizimin dhe kapjen e tij. Në vendngjarje, grupi hetimor nën drejtimin e Prokurorisë, po kryen veprimet hetimore për zbardhjen e rrethanave të ngjarjes dhe dokumentimin ligjor”, shtuan të njëjtat burime.
