Mesfushori i Shqipërisë, Keidi Bare, foli në konferencë për shtyp, në prag të ndeshjes që kuqezinjtë do të luajnë ndaj Ishujve Faroe.
Me objektivin Europian që tashmë është arritur, tashmë synimi është vendi i parë, siç e tha edhe mesfushori.
Bare deklaroi se klauifikimi në Europian ishte një ëndërr e bërë realitet, ndërsa tregoi edhe ndryshimin mes trajnerëve Reja dhe Silvinjo.
“Është një arritje shumë e madhe. Një ëndërr e bërë realitet. Por nuk duhet të ndalemi vetëm këtu sepse janë dhe gjëra të tjera. Kur kam folur me trajnerin në Barcelonë na ka motivuar shumë dhe na dha besim si ekip. Çdo gjë ka ndryshuar për mirë. Nga Federata…Sepse tani kemi një fushë shumë të mirë ku mund të bëjmë stërvitje, kemi një palestër tonën. Këto kushte janë shumë mirë për ne. Dëmtimet i kam kaluar. Më kanë lënë pak mbrapa, por do të vazhdoj të punoj fort për të arritur atje ku kam qenë dhe mbi të gjitha për të ndihmuar ekipin.
Unë e kam ëndërruar shumë që kur kam qenë i vogël Europianin. Jo vetëm unë por të gjithë. Për ne është diçka unike. Ja kemi dalë me punë, por dhe me mbështetjen e tifozëve. Edhe kur kemi luajtur jashtë na kanë mbështetur, për ne janë lojtari i 12-të.
Ky është vetëm fillimi. E kemi kaluar fazën e kualifikimit dhe duhet të mendojmë për më lart. Të hënën na pret një ndeshje tjetër dhe duam të qëndrojmë në krye të grupit.
Nuk mund të them që është një ndryshim, por mbi të gjitha tashmë kemi një grup shumë të mirë. Na ka ndihmuar të bëjmë një ekip solid si brenda dhe jashtë fushës. Tashmë jemi një. Trajneri na ka futur frymën që të jemi një grup.
Festa jonë ishte ajo në Moldavi me tifozët tanë. Do mendojmë për Ishujt Faroe pasi janë një ekip shtatlartë dhe që mbrohen mirë. Qëllimi ynë është që të mbyllim këto kualifikuese sa më mirë. Nuk kam kundërshtar të preferuar. Nuk ka shumë rëndësi cili ekip do na bjerë në grup”, tha Bare.
