84-vjeçari i cili u sulmua nga një qen pitbull pasditen e 2 nëntorit në Durrës, ka ndërruar jetë në spitalin rajonal.
Halil Basha nuk i mbijetoi dot plagëve të rënda të marra në kokë e trup, pasi qeni i rracës Pitbull doli nga rrethimi i banesës së Armand Lalës dhe kafshoi të moshuarin.
Ngjarja
Ngjarja u regjistrua në një nga rrugicat tek sektori hekurudha në Durrës, ku i moshuari kishte shtëpinë dhe fqinj ishte Armand Lala, që në banesën e marrë me qira mbante 3 qen pitbull.
Ka qenë ora 13.30 minuta kur qeni ka dalë nga rrethimi i banesës së Armand Lalës dhe ka kafshuar të moshuarin.
Një fiqnje ka treguar se ka parë qenin e bardhë i cili kishte shtrirë në tokë të moshuarin dhe po e kafshonte në kokë dhe trup. Në ndihmë të moshuarit ka shkuar një grua e cila gjendej aty me automjet. Pasi është ndalur ka goditur qenin, duke e larguar. Më pas është telefonuar policia dhe ambulanca.
Dëshmitë
Nipi i dëmtuarit Halil Basha, Bashkim Basha, ka treguar se para se ti ndodhte sulmi i qenit ndaj xhaxhait të tij, kishte takuar Armand Lalën, duke i thënë dhe këshilluar që të bënte kujdes me tre qenët se do të kafshojnë banorët e zonës. Por sipas tij, pronari i tre qenëve, i ka thënë se jashtë nuk sulmojnë njëri me përjashtim në pjesën e brendëshme të oborrit.
Armand Lala, në dëshminë para uniformave blu, ka treguar se ditën e ngjarjes ka qënë në punë dhe ka lënë 3 qentë brenda rrethimit të banesës. Më tej, ka shtuar se kur ka ardhur nga puna i kanë thënë fqinjët se, qeni i bardhë ka sulmuar dhe kafshuar shtetasin Halil Basha, të cilit i ka këputur edhe veshin dhe ndodhet në spital. Ai deklaroi se i vjen keq për shtetasin Halit Basha dhe kërkoi ndjesë për dëmtimin që i ka bërë qeni i tij.
Arrestimi
Dy ditë pas ngjarjes, policia arrestoi pronarin e qenit.
44-vjeçari Armand Lala akuzohet për veprën penale “Braktisja e kafshës të shoqërimit”.
