Deputeti Oerd Bylykbashi në studion e Top Story, kishte përballë gazetarin dhe pronarin e televizionit “Report TV”, Carlo Bollino. Ky i fundit akuzon Berishën si njeriun që i hapi rrugë dhëndrit të tij të përfitonte ish-klubin Partizani.
Por në debatin mes tyre, Bylykbashi i kujtoi Bollinos se edhe ai ka përfituar nga qeveria Rama duke qenë si ushtar dhe shërbyes i tij, jo pak por ka marrë me qira 1 euro m² një godinë pikërisht në truallin pranë ish kompleksit Partizani.
Bylykbashi e konsideroi Bollinon njeriun e afërt të Ramës dhe se ai në këtë çështje duhet të jetë i fundit që duhet të flasë. Madje Bylykbashi i tregoi Bollinos se emri i tij shumë shpejt do të jetë në dosjet e SPAK ku do të hetohet për aferat që mund të ketë bërë me qeverinë dhe përfitimet prej saj. Bylykbashi i tha Bollinos se për çështjen e ish Kompleksit Partizani është në konflikt interesi dhe për këtë arsye nuk duhet të flasë dhe të shkruajë kundër Berishës.
Një debat të ashpër për pronën Bollino e pati edhe me gazetarin Robert Rakipllari.
Bollino: Unë e kam marrë pronën ashtu sikurse e ka marrë edhe News 24, media ku punon Rakipllari.
Por i menjëhershëm ishte reagimi i Rakipllarit: E ke gabim dhe ti e di shumë mirë se e ke gabim. News 24 nuk e ka marrë pronën me 1 euro, por paguan qira për shtetin.
Bollino ka përfituar një sipërfaqe toke me rreth 4 mijë metër katrorë, e vendosur në një nga zonat më të kërkuara në Tiranë dhe vetëm me qira me shumën 1 euro kontrata.
Vendimi nuk është dhënë as për zhvillimin e industrisë, as për shkollë apo kopshte, por për ndërtimin e televizionit të Carlo Bollinos.
Sipas hartës së çmimeve të miratuar nga qeveria, për kompensimin e pronarëve, vlera në këtë zonë shkon nga 1 milionë deri në 1 milionë e 200 mijë lekë metri katror.
