Në Gjenevë, një tavolinë e gjatë e bardhë u shtrua me 230 karrige boshe, që nënkuptonin numrin e pengjeve të marra nga Hamas. Por shifra në fjalë nuk është më e fundit. Të dielën, zyrtarët izraelitë konfirmuan se numri i pengjeve ishte rritur në 239. Një zëdhënës i ushtrisë deklaroi se 40 persona të tjerë konsiderohen të humbur që prej 7 tetorit.
“Mbi të gjitha, sot jemi përpara Kombeve të Bashkuara, të cilave po iu kërkojmë të thonë publikisht dhe të gjithë botës lirimin e menjëhershëm të 230 pengjeve. Ato janë pengje të të gjithë botës, jo vetëm të Izraelit,” – u shpreh Sacha Levi, organizator i tubimit.
Në Athinë, postera me portretet e pengjeve u instaluan në një park, gjatë një ceremonie të ndjekur nga fare pak persona. Në të njëjtën kohë, në kryeqytetin grek u mbajt një manifestim pro-palestinez me rreth 15 mijë pjesëmarrës, që marshuan drejt ambasadës izraelite.
Protestat në mbështetje të palestinezëve janë mbajtur në të gjithë Evropën. Kështu, tubime kundër veprimeve të shtetit hebre në Gaza u organizuan në disa qytete, përfshirë Madridin, Lisbonën dhe Hagën.
