Sir Bobby Charlton, i cilësuar gjerësisht si një nga futbollistët më të mëdhenj të të gjitha kohërave dhe lojtari më i famshëm që Anglia ka prodhuar, ka vdekur në moshën 86-vjeçare.
Lajmin e konfirmoi familja e ish-futbollistit ku në një deklaratë zyrtare u tha: “Me pikëllim të madh ndajmë lajmin se Sir Bobby ndërroi jetë paqësisht në orët e para të mëngjesit të së shtunës. Ai ishte i rrethuar nga familja e tij.”
Menjëherë ka reaguar edhe Premier League e cila shkruan në Twitter:
“Jemi jashtëzakonisht të trishtuar kur dëgjojmë lajmin për ndarjen nga jeta të një prej lojtarëve më të mëdhenj në historinë e futbollit anglez. Ngushëllimet tona për familjen e Sir Bobi dhe për të gjithë Mançester Junajtid”, shkruhet nga kampionati anglez.
- Kush është Bobi Çarlton?
Charlton, i lindur në Ashington, Northumberland më 11 tetor 1937, iu bashkua Man.United fillimisht në vitin 1953 dhe bëri debutimin e tij me ekipin e parë tre vjet më vonë.
Një i mbijetuar i katastrofës ajrore të Mynihut ku pësoi plagë relativisht të lehta në aksident, i cili mori jetën e tetë shokëve të tij të klubit në vitin 1958, ai bëri 758 paraqitje për United, një rekord që qëndroi gjatë derisa u tejkalua nga Ryan Giggs.
Bobby Charlton e fitoi 3 herë Premier League në vitet 1957,1965 dhe 1967. Kulmi i karrierës së tij në klub erdhi në vitin 1968 kur ai ishte kapiten i United ,ndërsa udhëhoqi skuadrën drejt fitores në finalen e Kupës Europiane (sot e njohur si Champions League) në të cilën ai shënoi dy herë.
Charlton shënoi 249 gola për klubin, një rekord i cili më vonë u tejkalua nga Wayne Rooney dhe ishte golashënuesi më i mirë i Anglisë, me 49, derisa Rooney e kaloi atë në shtator 2015 .
Pas largimit nga United në maj 1973, Charlton luajti për Preston North End dhe pati edhe një eksperiencë të shkurtër me Waterford United në Irlandë.
Pas lamtumirës së tij nga futbolli i luajtur, ai filloi një karrierë si trajner, duke u kthyer te United në 1984, duke mbajtur një pozicion menaxherial deri në ardhjen e familjes Glazer në fillim të viteve 2010.
- Karriera me Anglinë
Krahas vëllait të tij të madh, Jack, i cili vdiq në korrik 2020, Charlton luajti një rol kyç në triumfin e Anglisë në Kupën e Botës në vitin 1966, të njëjtin vit në të cilin ai u bë futbollisti i dytë anglez i cili fitoi “Topin e Artë”, pas Stanley Matthews.
Në skuadrën e parë të “3 luanëve”, statistikat flasin vetë, 106 ndeshje dhe 49 gola, ndërsa numëron 4 ndeshje me ekipin U17, ku “tundi rrjetën” 5 herë.
Charlton gjithashtu luajti në Kupat e Botës 1962 dhe 1970 dhe ishte anëtar i skuadrës për finalet e 1958.
Kur Charlton u tërhoq nga futbolli ndërkombëtar në vitin 1970, 106 paraqitjet e tij ishin një rekord në Angli. Kjo e vendos atë të shtatin në listën aktuale të vendit, e cila kryesohet nga Peter Shilton me 125 ndeshje.
Ai festoi 86-vjetorin e lindjes 10 ditë më parë, më 11 tetor.
Futbolli anglez kështu humbet një nga më të mirët, por ajo që ka bërë futbollisti në fjalë do të mbetet përherë në zemrat e gjithë tifozëve të këtij kampionati.
