Janë zbardhur detaje të reja nga ngjarja e rëndë e regjistruar në aksin Peqin-Elbasan, në fshatin Papër, ku një grua u hodh nga furgoni në lëvizje dhe gjeti vdekjen e menjëhershme.
Viktima është shtetasja Merushe Gjuzi 55 vjeçe nga Rrogozhina. Viktima, njihej prej vitesh si shitëse ambulante e misrave të pjekur.
Sipas dëshmive të pasagjerëve, ajo ishte ulur në vendin e parë të pasagjerit të furgonit dhe teksa të tjerët kanë qenë të pavëmendshëm, ka hapur derën dhe është hedhur. Të gjithë të pranishëmit në furgon kanë zbritur për t’i dhënë ndihmën e shpejtë, por përplasja ka qenë fatale.
Shoqja e viktimës Merushe Gjuzi me të cilën udhëtonin këtë mëngjes tha se 55-vjeçarja kishte debatuar me bashkëshortin. Sipas saj, për shkak të këtij sherri ajo ndërmori sot aktin ekstrem.
“Gjithmonë rrinim të ulura në vendin e parë të furgonit, por këtë mëngjes deshi të ulej pas dhe u ul vetëm”, ka thënë shoqja e viktimës.
