Ka përfunduar para kohe edicioni për futbollistin shqiptar të Kosovës, Ismajl Bekën.
Qendërmbrojtësi mësohet se ka këputur ligamentin e gjurit të majtë, duke mbyllur kështu sezonin teksa do të operohet gjatë ditëve të ardhshme dhe faza e rikuperimit do të jetë e gjatë.
Lajmi është konfirmuar nga klubi i Luzern nëpërmjet një postimi në faqen zyrtare.
Dëmtimi i rëndë i Bekës ndodhi në momentin kur me shumë mundësi do të udhëhiqte mbrojtjen e Kosovës dhe gjasat ishin të mëdha që nëse nuk do të lëndohej, Beka të ishte titullar te Kosova të enjten ndaj Andorrës.
Qendërmbrojtësi pësoi dëmtimin e rëndë gjatë një dueli në ndeshjen kundër Lausane-Sport.
