Komisioni i Pavarur i Kualifikimit shpalli këtë të enjte vendimin e konfirmimit në detyrë për prokuroren e Tiranës, Suela Salavaçi.
Procesi i vetting-ut për prokuroren Suela Salavaçi u krye nga trupa e KPK e kryesuar nga Alma Faskaj, me relatore Suela Zhegun dhe anëtare Etleda Çiftjan. Në cilësinë e vëzhguesit ndërkombëtar ishte i pranishëm Ferdinando Buatier.
Gjatë seancës dëgjimore zhvilluar një ditë më parë, Salavaçi u pyet për çështje të pasurisë. Seanca zgjati rreth tri orë. Ajo kundërshtoi analizën financiare paraprake të Komisionit për pasuritë e dhuruara nga prindërit, duke e cilësuar të padrejtë shtrirjen e verifikimeve në çdo pasuri të krijuar apo të ardhur të përfituar prej tyre. Ajo kundërshtoi edhe analizën financiare për shpenzimet dhe investimet e kryera prej saj dhe bashkëshortit, duke pretenduar se kishte pasur të ardhura të ligjshme.
Ndërkohë që për sa i takon pastërtisë së figurës, mori vlerësim pozitiv. Salavaçi po ashtu iu përgjigj dhe interesit të togave të zeza mbi disa çështje për kriterin profesional.
Suela Salavaçi e nisi karrierën në sistemin e drejtësisë në vitin 2003 si prokurore në Prokurorinë e Durrësit. Prej vitit 2009, ajo e ushtron funksionin pranë Prokurorisë së Rrethit Gjyqësor Tiranë.
