Policia ka dhënë detajet e para lidhur me ngjarjen e ndodhur këtë të martë në Rrëshen ku mbeti i vrarë me armë zjarri një 62-vjeçar.
Viktima është identifikuar si Martin Bardhi, ndërsa ende nuk dihen shkaqet dhe rrethanat e ngjarjes apo kush janë autorët.
Raportohet se 62-vjeçari kishte dalë nga burgu vetëm pak kohë më parë, pasi akuzohej për vrasjen e nipit të Kastriot Reçit, Saimir Reçi.
Blutë bëjnë me dije se janë ngritur pika kontrolli në çdo aks rrugor, dhe po vijojnë hetimet për zbardhjen e plotë të rastit.
Njoftimi i policisë:
Rreth orës 10:40, në Rrëshen, nga shtetas ende të paidentifikuar, është vrarë me armë zjarri shtetasi M. M. (B.).
Shërbimet e Policisë, sapo kanë marrë njoftim, kanë shkuar menjëherë në vendngjarje. Janë ngritur pika kontrolli në çdo aks rrugor, si dhe vijon intensivisht krehja e zonës.
Ndërkaq, grupi hetimor, në drejtimin e Prokurorisë, po punon për fiksimin e çdo prove që do të bëjë të mundur identifikimin dhe kapjen e autorëve.
