Apeli i Gjykatës së Posaçme ka lënë në fuqi vendimin e shkallës së parë për Hekuran Markun, ish-truprojën e ish-ministrit të Brendshëm, Saimir Tahiri.
Marku u dënua më 14 Dhjetor të vitit të kaluar me 13 vite burg në shkallë të parë për veprat penale “trafik të narkotikëve” në bashkëpunim dhe “grup të strukturuar kriminal”, por për shkak të gjykimit të shkurtuar, dënimi përfundimtar i tij shkoi në 8 vjet e 8 muaj burg.
Pas ankimimit nga ana e të dënuarit, këtë të martë, Apeli la në fuqi vendimin e GJKKO-së.
Hekuran Marku u arrestua në gusht të vitit të kaluar në Gjermani për llogari të operacionit të koduar “Shpirti”. Ai u gjykua i veçuar nga të pandehurit e tjerë të dosjes, ndërsa në vijimësi ka mbajtur qëndrim mohues ndaj akuzave.
Operacioni “Shpirti” çoi në pranga 31 persona në korrik të vitit të kaluar, të akuzuar për trafikimin e një sasie prej 6 ton kanabis nga Shqipëria në Itali në vitet 2014-2017.
