Asnjë surprizë në tri takimet e javës së dytë të luajtura të shtunën për Superligën e volejbollit të meshkujve, teksa Partizani, Erzeni dhe Tirana siguruan fitore të pastra.
Partizanit i mjaftuan vetëm 56 minuta lojë për të mundur 3-0 Elbasanin në “Asllan Rusi” në një takim pa shumë histori. Të kuqtë e diktuan lojën që në start, me Raul Sabliqin që stampoi 7 pikët e para të ndeshjes radhazi, ndërsa seti i parë më tej u mbyll 25-15 për të zotët e shtëpisë.
Edhe në setin e dytë Partizani ishte totalisht dominues duke fituar 25-13, ashtu sikurse edhe në fraksionin e tretë të mbyllur 25-15.
Me këtë fitore “demat” pozicionohen në vend të parë falë diferencës më të mirë të seteve.
Ndërkohë pasi thyen Tiranën në start, Erzeni vijon ecurinë pozitive në kampionat, teksa futën në kasafortë edhe fitoren e dytë. Këtë herë Erzeni mundi në transfertë Skënderbeun me rezultatin 0-3.
Kampionët në fuqi, Tirana, mundën Teutën në “Farie Hoti”, duke marrë 3 pikët e para në kampionat. Tirana triumfoi me rezultatin 3- 0 në një takim që zgjati 1 orë e 11 minuta.
Bardheblutë e Arben Sakos ishin superiorë gjatë të gjithë kohës ndaj një Teute të pafuqishme për të reaguar.
Tirana i fitoi thellë të tria setet, përkatësisht në shifrat 25-17, 25-12 dhe 25-13.
