Ka shkuar në 93 numri i të arrestuarve në qarkun e Tiranës në kuadër të operacionit “Tempulli”, ku u goditën shpërndarësit e lëndëve narkotike.
Blutë e kryeqytetit bëjnë me dije se është arrestuar një prej “spaçiatorëve” të shpallur në kërkim, shtetasi Elidon Barruku, 21 vjeç, banues në Bathore.
Ai është lokalizuar dhe kapur në Kamzë, pasi Gjykata e Shkallës së Parë e Juridiksionit të Përgjithshëm Tiranë i ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”.
Më parë, gjatë zhvillimit të këtij operacioni, janë sekuestruar 10 kg lëndë e dyshuar narkotike cannabis sativa, 3.7 kg kokainë, 150 doza heroine, 1 armë zjarri pistoletë, 12 automjete, 78 celularë, 12 peshore elektronike, 3 motomjete, 30 000 euro, 6000 paund, 4 500 000 lekë dhe 12 targa automjetesh.
Policia njofton se vijon puna për lokalizimin dhe kapjen e shtetasve të tjerë të shpallur në kërkim në kuadër të këtij megaoperacioni.
Materialet i kaluan Prokurorisë së Tiranës për veprime të mëtejshme.
