Humbja e Polonisë përballë Kombëtares sonë në “Air Albania”, nuk rezultoi fatale vetëm për 3 pikët, por edhe për trajnerin portugez Fernando Santos që u shkarkua. Prej disa ditësh kombëtarja polake është pa trajner dhe drejtuesit po punojnë për të afruar në pankinë emrin e duhur.
Ditën e sotme në mediat polake është përfolur shumë se trajneri i ardhshëm i Polonisë mund të jetë Gianni De Biasi. Padyshim një emër i njohur për të gjithë popullin shqiptar, pasi ishte pikërisht tekniku italian që dërgoi Shqipërinë në Euro 2016, duke shkruar historinë.
De Biasi shihet nga polakët si i duhuri për stolin e tyre, duke parë që më parë ka drejtuar edhe ekipe si Spal, Torino, Modena apo Udinese.
Aktualisht italiani është nën kontratë deri më 30 nëntor më Azerbajxhanin, por në rast konkretizimi, vështirë se do të refuzonte ofertën polake. Edhe disa vite më pare emri i Gianni de Biasit është përfolur për këtë skuadër, por me sa duket tratativat nuk kishin avancuar.
Aktualisht trajneri Italian është në krye të pankinës së Azerbaixhanit, një skuadër relativisht modeste me të cilën edhe rezultatet i kanë munguar.
Bilanci i tij për 35 ndeshje që ka drejtuar këtë skuadër janë 8 fitore, 8 barazime dhe 19 humbje, ndërkohë që ka një kontratë deri në nëntor të këtij viti.
