Nga Boldnews.al
Drejtësi e re apo e vjetër, prokuroritë e gjykatat vijojnë ende të çudisin me vendimet e tyre. Propaganda për vendosjen e një sistemi të drejtë për qytetarët vijon, ndërsa këta të fundit dëgjojnë, kuptojnë dhe vuajnë në kurrizin e tyre kamxhikun që godet pabesisht po njësoj, të “drejtësisë së re”.
Ndodh që nëse je një qytetar i thjeshtë dhe kapesh me një qese hashash, gjykata të mbyll në qeli nën masën e arrestit me burg, nën “dyshimin” e trafikimit të drogës. Nëse je, supozojmë, një këngëtare me famë Instagrami dhe ke familjarë të lidhur ngushtë me sistemin e drejtësisë, lirohesh. Thua në gjykatë që kishte kuriozitet për ketë kulturë bujqësore të ‘bekuar’ edhe nga qeveria mavi dhe eksperienca dy ditore pas hekurave të qelisë mbaron shpejt.
Ndodh të dënohesh me burg për disa gramë hashash, por qelinë e përdor si dhome hoteli disa ditore nëse ke trafikuar me tonelata.
Ndodh që nëse ndërton pa lejë në mes të Tiranës, pushteti të ‘zbulon’, gjasme ti sekuestron pronat për disa filmime propagandistike të shpërndara në rrjetet sociale të udhëheqësit dhe atyre nën të dhe më pas ti vazhdon pazaret me kupolën duke marrë akoma dhe më shumë para publike në procedura tenderuese. Kjo ama, vetëm nëse je oligark! Por nëse je një 82-vjeçare që jeton e vetmuar në një fshat në Vlorë, policët të paraqiten me zell në derë, të ngarkojnë në fugon dhe të shpien në komisariat. Sepse ti ke shkelur ligjin! Ke ndërtuar një “pa leje” një … kotec pulash.
Ndodh edhe që të fortët e zonës me një deputet në fis të rrahin me shkopa bejsbolli, të thyejnë kockat e trupit e kokës dhe më pas amnistohen me shkresa zyrtare që të kanë plagosur lehtë. Edhe pse ti vuan ende pasojat e dhunës mizore dhe vrasjes së dinjitetit.
Ndodh po ashtu që një efektiv policie, në pabesinë e errësirës së natës, të shkrehë armën e shërbimit dhe ti marrë jetën një qytetari në lule të rinisë. Kështu u vra Kolodian Rasha në moshën 25-vjeçare gati tre vite më parë. E ëma, e rrënuar nga humbja e të birit, tha se ja vranë për herë të dytë kur makineria e propagandës së pushtetit shpërndau informacione se i ekzekutuari ishte përdorues droge, mbante armë me vetëm apo kërcënoi policin që i mori jetën pa mëshirë. Në fund, për vrasjen e tij, killeri me uniformë Nevaldo Hajdaraj u dënua me 10 vite burgim në shkallë të parë dhe 12 në Apel.
“Si mund ta quash këtë drejtësi”, klithi i ati i të riut kur mësoi vendimin.
Këtë të Premte, gjykata e Tiranës dënoi me 35 vite burg ish-policin e Ludjan Zaimi, i cili mbrëmjen e 23 majit 2022 vrau kolegun e tij, 55-vjeçarin Çaush Saliasi, në ambientet e komisariatit nr 3 në Tiranë.
35 vite burgim për një polici që vrau një polic. 12 vite burgim për një polic që vrau një qytetar.
Mos vallë jeta e një qytetari të thjeshtë vlen më pak në llogaritjet e drejtësisë së re?!
Historitë vazhdojë … jemi të burgosur dhe për shumë kohë, në kohën e vjetër të drejtësisë së re…
