Pavarësisht se merkatoja e verës ka përfunduar tashmë, tek Manchester City ka filluar puna për atë të dimrit. Një ndër objektivat e Pep Guardiolas është përforcimi i mesfushës dhe anglezët kanë ofruar 70 milionë euro për Paqueta.
Braziliani i West Hamit e ka impresionuar numrin një të stolit dhe sipas Fabrizio Romanos është pjesë e listës së bardhekaltërve për merkaton vijuese. Tek “The Hammers”, ishi i Milanit është shëndërruar në një ndër më të mirët e Premier Leagues dhe për kryeqytetasit largimi i tij është një mundësi shumë e mirë për të mbushur arkat.
Ndërkohë, në lidhje me 26 vjeçarin nga Rio de Janeiro duhet theksuar se e konsideron një opsion për të avancuar, duke qenë se Manchester City është ekipi i momentit, fitues në fuqi i Champions Leagues dhe Superkupës së Europës.
Si në çdo sezon bardhekaltërit konsiderohen favoritë për të fituar çdo trofe, të cilët e hoqën një peshë të rëndë mbi supe siç ishte shkruajtja e emrit në librin e fituesve të kompeticionit më të rëndësishëm për klube në kontinentin e vjetër.
