Piloti spanjoll i Ferrari, Carlos Sainz, siguroi sot pasdite “pole position” në pistën e Monza, të vlefshëm për garën e Çmimit të Madh të Italisë në Formula 1. Ai dha kohën 1’20”294, duke mposhtur me vetëm 13 të mijëtat Max Verstappen (Red Bull), i dyti.
Ky është “pole” i katërt në karrierë për Sainz, që përgjatë gjithë këtyre dy ditëve tregoi se ishte i shpejtë, ashtu sikurse edhe Ferrari. Në vendin e tretë u rendit monogasku Charles Leclerc me “kokëkuqen” tjetër, me vetëm 67 të mijëtat më shumë se shoku i tij i skuadrës.
Gjithsesi, të dyja makinat italiane janë nën hetim, për shkak se zhvilluan xhiron e daljes nga pista mbi kohën limit 1’41” në sesionin e parë të provave zyrtare. Vendimi do të merret më vonë.
Në vendin e katërt u klasifikua George Russell me Mercedes, që la pas Sergio Perez me Red Bull e Alexander Albon me Williams. Në dhjetë më të mirët u klasifikuan edhe Piastri (McLaren), Hamilton (Mercedes), Norris (McLaren) dhe Alonso (Aston Martin). Të dielën do të zhvillohet gara e Italisë.
