Një 50-vjeçar ka humbur jetën si pasojë e shpërthimit në oborrin e banesës së tij në fshatin Gjormë në Selenicë.
50-vjeçari Durmish Glluçaj ndërroi jetë rrugës për në spital. Fillimisht u raportua se ai ka humbur jetën nga shpërthimi i bombolës së gazit, por dyshimet janë se mund të ketë ndërruar jetë nga shpërthimi i një lënde plasëse.
Sipas policisë, shpërthimi ka ndodhur në oborrin e banesës së viktimës. Grupi hetimor po heton se për çfarë lënde plasëse bëhet fjalë.
“Në lidhje me informacionin paraprak të dhënë mëngjesin e sotëm, sipas të cilit, një shtetas njoftoi sallën operative të DVP Vlorë, se në banesën e fqinjit të tij, shtetasit D. G., kishte shpërthyer një bombol gazi dhe si pasojë e shpërthimit, shtetasi D. G. humbi jetën, gjatë rrugës për në spital, ju informojmë se: Nga veprimet paraprake hetimore të kryera nga grupi i posaçëm hetimor, rezulton se vendi i kësaj ngjarjeje nuk është brenda banesës së shtetasit D. G., por në territorin e jashtëm të banesës së këtij shtetasi. Grupi hetimor dhe ekspertët xhenierë, në drejtimin e Prokurorisë, vijojnë punën intensive për zbardhjen e rrethanave të kësaj ngjarjeje, për të përcaktuar çfarë ka shpërthyer, si dhe për të përcaktuar shkakun e shpërthimit”, njofton policia.
