Një ngjarje e rëndë u shënua ditën e djeshme në Sarandë në lokalin “Orange Club”, ku ndërroi jetë kamerieri 17-vjeçari pasi e zuri pajisja që përdorej për transport mallrash na një kat i lokalit në tjetrin.
Në lidhje me ngjarjen ka folur Lulzim Allkushi, i cili u arrestua ditën e djeshme, pasi është personi që ka montuar ashensorin.
43-vjeçari ka thënë se pajisjen për transportin e mallrave e ka instaluar 4 vite më parë dhe se që atëherë nuk e kanë thirrur më për kontroll.
“Para 4 vitesh më ka kontaktuar pronari i lokalit Orange. Më kërkoi që t’i montoja një pajisje si ashensor në mënyrë që të ngjisnin produkte ushqimore nga kati i parë në katin e dytë. Montimi është bërë që para 4 vitesh dhe që prej asaj kohe nuk më është kërkuar që ta kontrolloja”, ka thënë ai, raporton “ABC News”.
Kujtojmë që Antonio Delilaj 17 vjeç ka humbur tragjikisht jetën në Sarandë, teksa ndodhej në vendin e tij të punës. Adoleshenti ishte kamarier në “Club Orange” dhe punonte për të siguruar të ardhura, para se të niste shkollën.
Për këtë ngjarje tragjike është arrestuar shtetasi Lulzim Allkushi, personi që ishte përgjegjës dhe kishte instaluar pajisjen e transportit në “Club Orange”. Ai përdorej kryesisht për transportin e mallrave për furnizim, nga një kat i lokalit në tjetrin.
