Donald Trump është paraqitur zyrtarisht para autoriteteve në burgun e kontesë Fulton, në Xhorxhia, pasi akuzohet se komplotoi për të përmbysur rezultatet e zgjedhjeve presidenciale të vitit 2020 në këtë shtet.
77-vjeçari u bë i pari nga Presidentët amerikanë, i cili u fotografua nga autoritetet si një i dyshuar për ngjarje kriminale dhe iu caktua numri i të burgosurit P01135809, pasi u njoh më parë nga punonjësit e burgut Fulton për 13 akuzat që rëndojnë mbi të.
Arrestimi i përkohshëm i Trump sa për procedurë ligjore, pasi ai ka paguar garancinë për të mos qëndruar pas hekurave, u ndoq pasi Prokurori i Qarkut të rajonit Fani Ëillis akuzoi Trump dhe 18 nga bashkëpunëtorët e tij të ngushtë në fillim të këtij muaji.
Ky është grupi i katërt i akuzave penale që ngrihen kunddër Trump që nga marsi, kur ai u bë ish-udhëheqësi i parë i SHBA në histori që u padit zyrtarisht.
Gjatë ndalesës së tij të shkurtër në burg, Trumpit iu bë fotografia, iu morën shenjat e gishtave dhe iu ngarkuan të dhënat e tij personale përpara se të lirohej me kusht. Autokolona e Trump u pa më pas duke u larguar me shpejtësi nga burgu, pranë një grupi mbështetësish dhe anëtarësh të medias që prisnin jashtë.
Duke folur me gazetarët më pas ndërsa përgatitej të hipte në avionin e tij, republikani tha se kjo ishte një “ditë shumë e trishtë për Amerikën“.
Trump akuzoi gjithashtu kundërshtarët e tij politikë për “ndërhyrje në zgjedhje”, me tonet që ashpërsohen në një kohë kur ai po bën fushatë për t’u kthyer në Shtëpinë e Bardhë.
“Ajo që ka ndodhur këtu është një mashtrim i drejtësisë Ne nuk bëmë asgjë të keqe. Unë nuk bëra asgjë të keqe dhe të gjithë e dinë këtë. Unë kurrë nuk kam pasur një mbështetje të tillë.”
