Një 26-vjeçar me origjinë shqiptare nga Kosova është vrarë pak ditë më parë në Kanada.
Komuniteti shqiptar në Kanada është tronditur nga vrasja e një 26-vjeçari me origjinë nga Kosova.
Mediat lokale raportojnë se i riu u qëllua për vdekje pranë Carlsbad Springs herët në mëngjesin e së shtunës.
Policia u thirr në një adresë në Farmers Way rreth orës 3:45 të mëngjesit dhe gjeti shqiptarin Granit Ahmeti, që kishte marrë plagë nga të shtëna me armë zjarri.
Mediat kanadeze raportojnë se i riu u transportua në spital në gjendje kritike, ku më vonë u shpall i vdekur.
Në një deklaratë për media të shpërndarë të dielën, autoritetet iu kërkuan banorëve dhe bizneseve në lagjet Farmers Way, Anderson Road, Thunder Road dhe Piperville Road që të kontrollojnë kamerat e sigurisë dhe të raportojnë për çdo “aktivitet të dyshimtë” që mund të konstatojnë nga ora 02:00 deri në 04:00 të mëngjesit.
Sakaq, në një postim në Facebook, 26-vjeçari nga Ferizaj, përshkruhet nga kompania Canadian Towing, ku ishte aksioner si një “vëlla, partner i dashur dhe mik i sjellshëm”.
“Energjia dhe buzëqeshja e tij ishin gjithmonë kaq ngjitëse dhe dashuria e tij për jetën ishte e pakrahasueshme. Do të na mungojë më shumë se sa mund të shprehin fjalët.”
