Fotot e mëposhtme janë të një ngjarje që rrallë ndodh ta shohim në kryeqytet, pasi kalimi i automjeteve mbi digën e Liqenit Artificial është i ndaluar dhe aty gjen korsi të dedikuara për këmbësorë, vrapues dhe përdoruesit e biçikletave.
Por mëngjesin e sotëm aty është shfaqur një “BMW” luksoze, që është përplasur me muret mbrojtëse të digës. Në vendngjarje ndodhen ekspertë të policisë Rrugore, pastruesit dhe një karotrec i bashkisë së Tiranës.
Të shokuar në sfond shihen këmbësorët që bëjnë çdo mëngjes ecje apo dalin shëtitje në zonën e liqenit Artificial, aty ku jeta e tyre duhet të ishte në duar të sigurta pasi është një zonë e dedikuar për ta.
Nga rindërtimi paraprak i skenës së ngjarjes, rezulton se makina tip “BMË X6” ka qenë duke duke lëvizur me shpejtësi mbi normat e lejuara në “Rrugën e Kosovarëve” dhe ka ngjitur maloren e digës së liqenit, duke u ndalur vetëm nga barrier anësore.
Dyshohet se drejtuesi në momentin e aksidentit ka qenë në gjendje të dehur dhe pas aksidentit ka braktisur mjetin duke marrë edhe target, dhe është larguar nga vendngjarja.
Fotot nga vendngjarja janë postuar në Facebook nga pedagogu dhe aktivisti, Ervin Goci, i cili ka hasur në këtë skenë tronditëse në orët e para të mëngjesit.
Me ironi ai i drejtohet ministrit të Brendshëm, Taulant Balla, duke kërkuar asgjë më shumë se sa skedimi i personave me precedentë që drejtojnë mjetet në rrugët e vendit.
“Ministrit të Brendshëm që ka passion të takojë turistët, nuk i kërkojmë asgjë më shumë veccse të skedojë të gjithë ata me precedent në timon, të shikojë pak këtë punën e kuajve fuqi të makinës dhe mirësisht kërkojmë të bëjë ccmos që makinat mos të na fluturojnë në ballkon, pa në rrugë e dimë që na ruan Zoti”, shkruan Goci.
