Nga Boldnews.al
Në mes të Korrikut 2023, një grup i zgjeruar policësh, me praninë e posaçme të drejtuesit të Inspektoratit Kombëtar i Mbrojtjes së Territorit (IKMT), Agim Ismaili, u paraqitën në plazhin “Laguna” në Ksamil.
Sipas njoftimit zyrtar policor, gjatë kontrolleve të territorit në vijën bregdetare në jug të vendit, u konstatuan një lokal plazhi pa leje.
Uniformat blu deklaruan më tej, “u referuan materialet procedurale në Prokurori dhe u shpall në kërkim Resul Piro, për veprat penale “Ndërtimi i paligjshëm” dhe “Pushtimi i tokës” për objektin dhe punimet përreth, në zonën e njohur si “Laguna”.
Në kuadër të këtij operacioni, autoritetet thanë se kanë “sekuestruar në cilësinë e provës materiale 120 çadra dhe 240 shezlonge”.
Fotot që shoqëronin njoftimin policor tregonin çadrat e mbyllura dhe shezlonget e mbledhura, të cilat janë përshtypjen se operacioni i forcave blu dhe IKMT-së kanë dhënë rezultat befasues.
Por, pas show-t institucional në kulmin e vapës, gjithçka në realitet është shumë më ndryshe.
Në redaksinë e “Boldnews.al” mbërriti një denoncim në këto orët e fundit, në të cilat thuhet se plazhi “Laguna” dhe lokali Brenda tij funksionojnë rregullisht, njëlloj siç ndodhte para “mësymjes” policore dhe të IKMT-së.
Denoncuesi ka dërguar edhe foto të ditëve të fundit, në të cilat dallohet qartësisht se “Laguna” është një plazh i rregullt, funksional dhe pritës për turistët, të cilët as nuk e kanë idenë dhe as nuk janë të interesuar nëse pronari i shezlongëve dhe lokalit është në kërkim për paligjshmëri.
Ndërkohë, “Boldnews.al” ka kryer verifikime në rrjete sociale për ngjarje të shënuara tek “Laguna”, pas 19 Korrikut 2023, ditë që Policia dhe IKMT ndërmorën aksionin në atë plazh.
Fotot e postuara në “Instagram” nga vetë administruesit e plazhit, si edhe nga pushuesit, dëshmojnë që aktiviteti tregtar i “Lagunës” vijon i qetë dhe normalisht, sikur asgjë të mos kishte ndodhur.
Kjo situatë ngre dyshime të forta se, ose operacioni i përbashkët Polici-IKMT ka qenë thjesht show dhe i pabazuar, ose spektakli me bllokime plazhi është thjesht një formë për të hedhur hi syve opinionit publik për efikasitetin dhe efektivitetin e luftës së institucioneve kundër paligjshmërisë në bregdet.
Prej disa javësh, Policia dhe institucione të tjera qeveritare kanë nisur operacionin “Plazhi i Pastër”, i cili synon të sigurojë dhe garantojë siguri dhe qetësi për qytetarët që kanë vendosur të shijojnë brigjet shqiptare në këtë verë.
Thuajse çdo ditë, nga policia apo IKMT raportohet për shezlonge të sekuestruara, pasi kanë pushtuar plazhe në paligjshmëri apo bllokim të mjeteve të transportit ujor, si skafe e motorë uji.
Kjo veprimtari është për t’u vlerësuar dhe përshëndetur, por, vetëm në rast se është reale dhe e qëndrueshme.
Rasti i plazhit “Laguna” në Ksamil dëshmon se, pas mbylljes së aparatit fotografik të Policisë dhe IKMT-së, gjithçka kthehet në normalitet dhe vijon sikur asgjë të mos ketë ndodhur.
