Policia e Durrësit ka arrestuar një 36-vjeçar, pasi lëvizte i armatosur me pistoletë me fishek në fole, të gatshme për qitje.
Në kuadër të operacionit policor të koduar “Background” është vënë në pranga shtetasi Dritan Memolla, banues në Durrës, person me rrezikshmëri të lartë për komunitetin, sipas autoriteteve policore. Ai gjithashtu kishte thyer dhe masën e sigurisë “arrest shtëpie”.
“Ky shtetas u kap në flagrancë teksa lëvizte me këmbë, në lagjen nr.15, dhe gjatë kontrollit fizik të tij, Policia i gjeti 1 armë zjarri pistoletë me fishek në fole, të gatshme për qitje. Nga verifikimet ka rezultuar se 36-vjeçari kishte thyer masën e sigurisë “Arrest në shtëpi”, të caktuar për një aksident rrugor, me pasojë vdekjen. Gjithashtu, ky shtetas kishte precedent të theksuar penal për krime në fushën e narkotikëve. Në vijim, pistoleta dhe krehri i saj me fishekë luftarak, u sekuestraun në cilësinë e provës materiale.” – thuhet në njoftimin e bluve të qytetit bregdetar.
Gjithashtu, policia ka proceduar në gjendje të lirë dhe shtetasit N. K., 56 vjeç dhe K. K., 22 vjeç (babë e bir), lidhje shoqërore të 36-vjeçarit, për veprën penale “Moskallëzimi i krimit”. Ata shoqëronin Dritan Memollën, kur u kap nga Policia.
Materialet procedurale i kaluan Prokurorisë pranë Gjykatës së Shkallës së Parë, të Juridiksionit të Përgjithshëm Durrës, për veprime të mëtejshme.
