Një 30-vjeçar shqiptar në Itali kishte krijuar një metodë të personalizuar për të shpërndarë lëndë narkotike, edhe pse ndodhej nën masën e sigurisë “arrest në shtëpi”.
Fakti që kishte një byzylyk elektronik në këmbë që e pengonte të dilte nga dera e banesës, nuk e ka penguar aspak të riun, i cili i furnizonte klientët e tij duke ua hedhur dozat e kokainës nga ballkoni.
Por hera e fundit që ka shitur “mallin” nuk i ka shkuar aspak mirë, pasi karabinierët në fakt ishin vendosur poshtë shtëpisë dhe sapo u hodhën dozat te klienti, kanë ndërhyrë.
Në momentin e arrestimit ai i hodhi klientit të tij dy doza kokainë, ndërsa karabinierët që po e ruanin e befasuan shqiptarin teksa ishte ende i përkulur nga ballkoni.
30-vjeçari u arrestua dhe u dërgua në Bolonja, ku u gjykua me mënyrë të përshpejtuar.
