Më shumë meshkuj homoseksualë dhe biseksualë do të jenë në gjendje të dhurojnë gjak duke filluar nga sot pasi Kryqi i Kuq fillon zbatimin e një ndryshimi historik të rregullave të miratuar muajin e kaluar nga autoritetet federale amerikane. Këto janë kufizime që u vendosën në vitet ’80 dhe konkretisht gjatë krizës së HIV/AIDS.
“Kryqi i Kuq feston këtë përparim të rëndësishëm dhe gjithashtu pranon se ka më shumë punë për të bërë për ta bërë dhurimin e gjakut edhe më gjithëpërfshirës,” tha organizata në një deklaratë.
Sipas FDA, të gjithë donatorët e mundshëm do të plotësojnë të njëjtin pyetësor për vlerësimin e rrezikut për të përcaktuar aktivitetin e tyre seksual të kohëve të fundit, me synimin për të reduktuar “rrezikun e transmetimit të HIV-it nëpërmjet transfuzionit të gjakut”. Kujtohet se në maj FDA kishte deklaruar se rregullat e reja mund të rrisin potencialisht numrin e njerëzve që mund të dhurojnë gjak.
Në të njëjtën kohë, Kryqi i Kuq thekson se siguron 40% të gjakut të disponueshëm në SHBA dhe ka paralajmëruar mungesa serioze. Sipas Kryqit të Kuq, vetëm 3% e të moshuarve që dëshirojnë të dhurojnë gjak e bëjnë këtë çdo vit. Mungesa e gjakut ka prekur zona si Austin, Filadelfia si dhe Arkansas veriperëndimor.
