Mesjava ‘nxehet’ edhe më shumë, teksa emocionet e eliminatoreve europiane nisin që në mbrëmjen e të martës me sfidën Buducnost-Struga. Ndeshja e vlefshme për turin e dytë eliminator të Conference League, do të luhet në ‘Gradski Stadion’ të Podgoricës nga ora 21:00.
Skuadra kampione e Maqedonisë së veriut, e drejtuar nga trajneri Shpëtim Duro, fitoi me rezultatin minimal 1-0 ndeshjen e parë, të zhvilluar më 26 korrik në stadiumin e Ohrit.
Struga do të kërkojë të mbrojë avantazhin e marrë në Ohër me golin e Besart Ibraimit, për të siguruar kalimin në turin e tretë eliminator të Conference League, që do të ishte një arritje historike për kampionët e Maqedonisë, të cilët garojnë këtë vit për herë të parë në kompeticionet europiane.
Pavarësisht eksperiencës së paktë në grup, skuadra shqiptare e Maqedonisë së Veriut udhëton drejt Podgoricës me besim dhe dëshirë për t’u kualifikuar.
