Gjykata e Posaçme ka dhënë masën e sigurisë arrest me burg për 6 personat e arrestuar në kuadër të operacionit “Metamorfoza”, mes të cilëve emra të njohur të botës së krimit, policisë, biznesit dhe drejtësisë.
Bëhet fjalë për biznesmenin Pëllumb Gjoka, ish-drejtori i forcave operacionale në Policinë e Shtetit Oltion Bistri, drejtuesi i prokurorisë së Kukësit Xhevahir Lita, si dhe shtetasit Esmar Bilali, Ardit Hasanbenga dhe Edmond Preka.
Ata akuzohen për veprat penale “Vrasja me paramendim”, “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”, “Korrupsion aktiv i gjyqtarit, prokurorit dhe i funksionarëve të tjerë të drejtësisë”, “Heqja e paligjshme e lirisë”, “Shpërdorimi i detyrës”, “Ekspertimi i rremë”, “Fallsifikimi i dokumenteve”, “Trafikimit të narkotikëve”, “Mbajtja pa leje dhe prodhimi i armëve, armëve shpërthyese dhe municionit”, në bashkëpunim në formën e “Grupit të strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale ose veprimtarisë kriminale”.
Po ashtu, GJKKO ka vendosur të lërë të pandryshuar dhe masën e sigurisë për 9 personat e tjerë të shpallur në kërkim, shtetasit: Behar Bajri Brahoviç, Ervis Martinaj, Denis Bajri Brahoviç, Klaudio Haka, Prekë Kodra, Aleks Ndreka, Arsat Bashli, Bardhyl Mavraj, Elion Hato.
Seanca e sotme u ndërpre për dy orë, avokatët kërkuann kohë për t’u njohur me vendimin e masës së sigurisë dhe aktet e dosjes.
Pas seancë, është prononcuar për mediat Ylli Manjani, avokat i biznesmenit Pëllumb Gjoka në këtë proces, ku sipas tij, nuk ka prova dhe se Prokuroria është nisur me indicie të policisë.
“Çdo veprim procedural i zotit Gjoka dhe të të tjerëve është se; askush prej tyre nuk është i pandehur. Pra nuk ka as akuza. Sipas ligjit Bolshevik shqiptar, lejohet arresti dhe për peronat nën hetim. Ndaj lejohet kjo gjë. Ne mendojmë në kor dhe dhamë opinion, e gjithë kjo nisi mbi bazën e indiceve policore. Nuk ka përgjime se mbushët dynjanë. Është sikur të hysh në arkivë dhe të vjedhësh të dhëna. Nuk ka asnjë provë se klienti im të ketë përgjime. Nuk është kapur asgjë. Të gjitha këto janë spekulime. Prokuroria ishte e qartë; flitet për persona nën hetim dhe indicie, që janë marrë me letër porosi nga Franca. Letër porositë që kanë ardhur nga Franca, nuk është e qartë, pasi nuk ka aparate të kapura. Të gjitha janë spekulime, mos merrni njerëz në qafë.”, tha Manjani.
Hetimi që çoi në pranga zyrtarë të lartë të policisë, biznesmenë dhe prokurorë, u bë pas një bashkëpunimi intensiv dhe hetimeve me Eurojust, Europol dhe agjencitë ligjzbatuese belge, hollandeze dhe franceze, lidhur me disa shtetas shqiptarë të përfshirë në aktivitet kriminal në Shqipëri dhe në disa vende europiane.
Përgjimet e ardhura nga autoritetete franceze, pas çkodimit të mesazheve në aplikacionet “Sky” dhe “Encro, çuan në zbulimin e 4 ngjarjeve kriminale të ndodhur gjatë vitit 2020 dhe 2021 në Shkodër, më konkretisht për:
-Vrasjen Gjin Boriçi Ndoji, në Shkodër në gusht 2020.
-Vrasjen e mbetur në tentativë të Taulant Pepaj, në Shkodër në shkurt 2021
-Sigurimin e kushteve për vrasjen e Kleant Musabelliut në Tiranë shtator 2020.
-Sigurimin e kushteve për vrasjen e Dorjan Dhuli, Ibrahim Licit dhe Genc Tafilit, në 2020.
