Historia e hasmërisë mes fiseve Leksakaj dhe Nikulaj dyshohet se ka sjellë viktimën e radhës. Nikolin (Marku) Leksakaj, 42 vjeç, baba i një vajze të mitur, është vrarë me armë zjarri pasditen e kësaj të mërkurë në fshatin Balldre të Lezhës.
Fotot nga vendngjarja tregojnë trupin e pajetë të viktimës të mbuluar me çarçaf.
Dyshohet se 43-vjeçari është qëlluar me breshëri pas daljes nga marketi nga një automjet në lëvizje që vinte nga rreth-rrotullimi i Lezhës me drejtim Shkodrën. Sipas dëshmitarëve, automjeti ishte me xhama të zinj dhe prej aty ka qëlluar një qitës.
Për nga mënyra e të vepruarit, dyshimet e grupit hetimor janë se vrasja ka qenë e mirëmenduar dhe viktima është mbajtur nën survejim.
Forca policore ndodhen në vendngjarje dhe një hetim ka nisur për krimin. “Më datë 19.07.2023, rreth orës 18:30, në Balldre, Lezhë, në rrethana ende të paqarta është vrarë me armë zjarri shtetasi N. M (L), rreth 42 vjeç. Menjëherë në vendngjarje kanë shkuar shërbimet e Policisë dhe kanë bërë rrethimin e zonës, janë ngritur pika kontrolli e vijon krehja e zonës për identifikimin dhe kapjen e autorit/ëve. Grupi hetimor nën drejtimin e Prokurorisë po vijon punën për zbardhjen dhe dokumentimin e rrethanave të ngjarjes, identifikimin dhe kapjen e autorit/ëve”, njoftoi policia.
Viktima i kishte shpëtuar një atentati në vitin 2012. Asokohe, një sasi lënde plasëse u vendosur në mjetin e tij BMW X5 dhe shpërtheu gjatë lëvizjes, por nuk Lekstakaj nuk u lëndua.
Hakmarrja
Dyshimet e para janë se krimi i sotëm vjen si hakmarrje për vrasjen e biznesmenit Ardian Nikulaj, në Prill. Këtë e konfirmoi vetë drejtori i Policisë vendore të Lezhës. “Dyshojmë për hakmarrje ose gjakmarrje”, tha ai në një prononcim për gazetarët nga vendngjarja.
Nikulaj u qëllua me armë zjarri teksa ishte në lokalin e tij në Shëngjin tre muaj më parë, po më datë 19.
Prokuroria ka konfirmuar se krimi u krye nga një grup prej gjashtë personash (4 britanikë, 1 portugez dhe urdhëruesi shqiptar), të gjithë të arrestur në kohë të ndryshme jashtë vendit (5 në Britani dhe ezkekutori – portugezi Ruben Saraiva në Marok). Për të gjithë, autoritetet shqiptare kanë njoftuar se kanë nisur procedurat e ekstradimit, që megjithatë nuk pritet të jenë të thjeshta për tu realizuar. Në Britani, avokatët e të pandehurve pretendojnë se sistemi i burgjeve në Shqipëri është i pasigurt, ndërsa me Marokun Shqipëria nuk ka një marrëveshje ekstradimi.
Porositësi i vrasjes është cilësuar nga hetuesit Edmond Haxhia, i afërm i familjes Leksakaj.
Shkaku, sipas prokurorisë, ishte hasmëria që familjet Lestakaj dhe Nikulaj kanë pasur prej vitesh. Historia e gjakmarrjes mes tyre nisi në vitin 1996, pas një konflikti për 10 mijë lekë të vjetra e që dyshohet se ka shkaktuar disa të vrarë nga të dy fiset.
