Bayern Munich nuk heq dorë nga Harry Kane, edhe pse Totenhemi për momentin u ka rezistuar ofertave që janë bërë për sulmuesin anglez.
Futbollisti duket se është gati të shkojë në Gjermani dhe këtë e konfirmon tashmë edhe një nga emrat më të njohur të klubit bavarez, Uli Hënes.
I kthyer si pjesë e rëndësishme e bordit drejtues të Bajernit pas vitit të fundit shumë problematik në këtë klub, Hënes ka folur për gjermanen “Kicker”, duke theksuar se ka një akord me futbollistin e Anglisë.
“Nëse ai do të mbajë premtimin që ka bërë, do të jetë një futbollist i Bajernit. Rumenige flet me të rregullisht”, zbuloi Hënes situatën me sulmuesin. Gjë që bën të qartë se Kejn është personalisht dakord që të zërë vendin në sulmin e Bajern, por tashmë pret vetëm lejen e Totenhemit, që insiston për shifrën 100 milionë euro për kartonin e tij.
