Emisioni “Rrëfimi Juaj” sjell në këtë puntatë rrëfimin e 77-vjeçares Fatimea Faratozi, vuajtjet që ka përjetuar dhe skamjen që është gjendur në pjesën më të madhe të jetës së saj. Kalvari i vuajtjeve të Fatimes nis në momentin kur vëllezërit e martuan në moshën 17 vjeçare me një burrë që nuk e njihte, që e gënjente, e dhunonte, dhe nuk ishte i përgjegjshëm për fëmijët e tij.
Shumë pak kohë pas martesës Fatimea së bashku me fëmijët dhe bashkëshortin filluan të endeshin në rrugët e qytetit të pastrehë, pasi çdo derë do i mbyllej në fytyrë. Ndërtesat e braktisura që ajo gjente për t’u strehuar i shkaktonin probleme shëndetësore fëmijëve të saj, por fatmirëshisht asaj i hapi derën një person që nuk e njihte. Bashkëshorti Fatimes asnjëherë nuk e dërgoi pagën mujore në familje, duke bërë që fëmijët të vuanin urinë e për më tepër u arrestua në Tiranë, pasi u kap në flagrancë duke blerë një pistoletë.
E vetme dhe me 2 fëmijë Fatimea e kishte pamundur që të siguronte jetën. Personi i cili i kishte hapur dyert i jep një zgjidhje…të ndahej nga bashkëshorti saj dhe të niste një jetë të re me nipin e tij, por që Fatimea nuk e pranoi një gjë të tille. Ajo vendosi t’i jepte fund jetës së saj, duke u shtrire tek shinat e trenit, por fatmirësisht Fatimja u pikas nga disa persona që bënë të mundur që treni të ndalonte.
Pas këtij akti ajo merr një apartament dhe pas daljes nga burgu të bashkëshortit, Fatimea u përpoq sërish ta afrojë pranë familjes, por veset e tij nuk ndryshuan. Ajo për një kohë të shkurtër punoi si fatorino, ku disa herë ka qenë pranë vdekjes për shkak të aksidenteve të ndryshme.
E gjendur në skamje, Fatimea ishte përgatitur për të takuar Ramiz Alinë teksa po vinte për vizitë në varrezat e dëshmorëve dhe do i tregonte për problemet që kishte, kur u spiunua nga bashkëshorti i saj dhe menjëherë u vendos në pranga nga sigurimi.
Anëtarët e Këshillit vendosen ta shtronin ne spitalin psikiatrik dhe pas shumë përpjekjesh për ta paralizuar me ilaçe, ajo arrin të arratiset duke liruar të gjithë pacientet e tjerë. Në fillim të viteve ‘90, një goditje tjetër e rendë për të ishte vdekja e vajzës së saj në Itali.
Sot Fatime Faratozi, ditët e fundit të jetës ia ka kushtuar përkujdesjes së kafshëve, ku në pallatin e saj ka krijuar një vend pushimi për të gjithë kafshët e braktisura. Ajo shprehet se i kupton tej mase, pasi ka jetuar prej 65 vite si ata.
“Minjtë i hëngrën veshin çunit, u detyrova ta shtroj në spital. Mora fëmijët i vura në qoshe, dhe u shtriva tek shinat e trenit. Që të rrezikoja jetën time dhe të mi merrte qeveria fëmijët, të kujdesej për ta. Se ishin të vegjël, doja të bëja vetëvrasje. Aty qëllon postblloku, më zbuluan, ndaluan treni.
Kam dashur shumë herë të kryej vetëvrasje. Më çuan dhe në çmendinë, më hapën dhe kartelë. Po im shoq ma bëri. Më lanë tre ditë pa përmendur në çmendinë. Im shoq më spiunoi se do i dilja Ramiz Alisë përpara, do i dilja t’i tregoja hallin, ai me spiunoi. Më futën në çmendinë. Atje ka qenë shumë e vështirë. Si zogu në kafaz. Më detyronin të pija ilaçe, na bënin dhe gjilpëra”.
