Kiri Mernica dhe Sadri Selaci janë dënuar me nga 19 vite burg secili, ku janë shpallur fajtorë si autorë të vrasjes së 23-vjeçarit Florian Selimi, krim i regjistruar në vitin 2019. Vendimi është dhënë ditën e sotme nga Gjykata e Fierit.
Ngjarja për të cilën ata akuzohen ndodhi natën e datës 11 Gusht të vitit 2019 në fshatin Hamil të Fierit. Ata dyshohen se sulmuan me thikë 23-vjeçarin, i cili ishte duke rregulluar gomën e makinës në një rrugicë të errët, pranë fshatit të tij.
Selimi kishte njoftuar babain e tij për prishjen e makinës, por kur ai shkoi aty gjeti vetëm njolla gjaku. Florian Selimi ishte goditur me thikë në qafë dhe trupi i pajetë ishte hedhur në kanalin pranë dhe u nxorr nga policia.
Dyshohet se fillimisht të rinjtë janë zënë verbalisht pse 23-vjeçari Florjan Selimi kishte zënë rrugën. Më pas njeri prej të arrestuarve ka nxjerrë thikën dhe e ka goditur. Autorët dhe viktima jetonin në të njëjtin vend, në fshatin Sulaj. Familja e të ndjerit prej disa vitesh ishte shpërnguluar nga Tropoja në Fier.
