Personi që shihni në foton e mëposhtme është 29-vjeçari Ramazan Sina, i cili mbeti i vrarë nga atentati i regjistruar mesnatën e kaluar në fshatin Larushkë të Fushë Krujës. Bashkë me të mbeti i plagosur dhe nipi i tij, Alvi Bejtja, 13-vjeç.
Ata u qëlluan me breshëri kallashnikovi në momentin kur po hynin në banesën e Gentjan Bejtjas, (babai i Alvit dhe kunati i Ramazanit), i cili dyshohet se ka qenë dhe shënjestra e atentatit, por në momentin e ngjarjes ai nuk ndodhej në banesë.
![](https://boldnews.al/wp-content/uploads/2023/07/Ramazan-Sina-640x905.jpg)
Autorët janë afruar rreth 20 metra pranë banesës dhe kanë qëlluar me breshëri kallashnikovi, në momentin kur Ramazan Sina dhe Alvi Bejtja ndodheshin në ballkonin e katit të dytë të banesës.
Ngjarja ka ndodhur rreth orës 00:15 të mesnatës së kaluar. Dyshohet se kanë qenë 3 autorë, dy në rolin e qitësit dhe një në rolin e shoferit. Rreth 25 minuta pas ngjarjes kriminale, makina e autorëve tip “Volkswagen Golf 5” është gjetur e djegur në zonën e Lapidarit në Tapizë, bashkë me 3 kallashnikovë brenda. Mjeti ishte pa targa dhe është grabitur pak kohë më parë në Tiranë. Dyshohet se autorët janë ndihmuar dhe nga persona të tjerë për t’u larguar pas krimit.
13-vjeçari Alvi Bejtja, djali i Gentjan Bejtjas, ndodhet në spital në gjendje të rëndë shëndetësore dhe i është nënshtruar një ndërhyrje kirurgjikale. I plagosur lehtë nga atentati ka mbetur dhe djali tjetër i Gentjan Bejtjas, i cili ndodhej në banesë.
Kush është Gentjan Bejtja
![](https://boldnews.al/wp-content/uploads/2023/07/Gentjan-Bejtja-640x896.jpg)
Gentjan Bejtja së bashku me Enver Stafukën, ishin personat që vodhën makinën e përdorur për vrasjen e kryekomisar Dritan Lamajt në shkurt të vitit 2013. Gjithashtu, ish-polici Bejtja i ka shpëtuar edhe një atentati me minë të telekomanduar në vitin 2016.
Bejtja i ka shpëtuar edhe më parë atentatit, ku në vitin 2022, ndaj tij është qëlluar me breshëri kallashnikovi teksa lëvizte me makinë në zonën e Niklës, i shoqëruar nga Klodian Stafuka. Në atë kohë Gentian Bejtja mbeti i plagosur.
Gentjan Bejtja rezulton person me precedentë penalë të mëparshëm në fushën e veprave penale kundër personit dhe pronës, si dhe i arrestuar me arsenal armësh në banesë.
Përveç precedentëve të mëparshëm, pas atentatit të natës së kaluar dyshohen dhe dy krime të tjera me të cilat Bejtja ka lidhje.
Emisionin “Në Shënjestër” ka publikuar dëshminë e Gentjan Bejtjas për vrasjen e biznesmenti të kromit, Iljas Çalit, më 3 prill 2022 në segmentin e autostradës Tirane- Durrës, kur persona ende të pa identifikuar më një makinë e cila lëvizte në paralel më makinën e Çalit hapën zjarr ndaj tij duke e lënë të vdekur në vend.
Bejtja ishte një nga personat e fundit që kishte kontakte me Çalin. Në dëshminë e tij për policinë, ai ka treguar dhe vizitën 3-4 ditë para vrasjes.
Tri apo katër ditë përpara se të vritej, kam qenë në shtëpinë e Iljas Çalit për vizitë bashkë me gruan dhe fëmijët. Flisja me të vazhdimisht. Për herë të fundit kam shkëmbyer mesazhe me të, një orë përpara se të vritej. Iljasi me dërgoi një video fetare dhe më shkroi: ‘Dëgjoji se janë fjalë të mëdha’. Unë i shkrova: “Jam tu nejt në shtëpi” dhe i dërgova një foto nga telenovela e Ertugrulit.
Më tha që ‘e kam marrë vetë minierën’. Lajmin e vrasjes e mësova nga televizori. Në varrimin e Iljasit nuk shkova, sepse unë kisha miqësi me të, por nuk kisha lidhje aq të forta me familjen e tij” –ka dëshmuar para grupit hetimor Gentjan Bejtja.
Alibia e tij për të mos shkuar në varrimin e mikut, me të cilin kishin hyrje dalje familjare nuk iu është dukur e besueshme hetuesve. Duket se ai nuk shkoi për t’i dhënë lamtumirën e fundit Iljas Calit, për të shmangur kontaktet me disa personazhe të tjera nga Nikla, që gjendeshin në atë varrim, Ku siç thuhej Bejtja kishte konflikte dhe përplasje të lindura kohët e fundit.
Po kështu Bejtja ka dhënë dëshmi edhe për atentatin ndaj Marklen Hakës, një tjetër ngjarje e cila dyshohet se qëndron pas atentatit të djeshëm.