Kreu i KLP-së, Alfred Balla e ka konsideruar si koincidencë emërimin e katër anëtarëve të familjes së deputetes Ermonela Felaj në Prokurorinë e Tiranës.
Pas pyetjeve të deputetes Albana Vokshi, Balla deklaroi se nuk i lidhin emrat dhe mbiemrat e deputetëve me ata të prokurorëve dhe se në rastin në fjalë nuk ka shkelje të ligjit pasi ndryshe nuk do e ngrinte dorën.
“Ne nuk i lidhim emrat dhe mbiemrat e prokurorëve me deputetë, disa i dimë dhe disa nuk i dimë. Vetë ju keni shfuqizuar një nen të ligjit në vitin 2019. Ka qenë një koincidencë që në prokruri të madhe të ushtrojnë detyrën anëtarët e të njëjtës familjes. Ju keni miratuar një ligj në vitin 2019, nëse doni ta ndryshoni, në rregull. Ne penghes ligjorë nuk kemi.” –tha Balla.
Sa i përket prezencës së ambasadores amerikane Yuri Kim në procesin për zgjedhjen e kreut të SPAK, Altin Dumani, kreu i KLP-së Alfred Balla deklaroi se nuk ka patur asnjë problem.
“Mua më duket se ai ka qenë një nga proceset më transparente dhe më dinjitoze. Kanë qenë prezente, mediat, ambasadorja, përfaqësues të tjerë. Momenti final ka qenë pasi dëgjuam të tre kandidatët. Gara ka qenë e drejtë dhe e ndrershme. Unë kam qenë në drejtim të seancës kur ka hyrë ambasadorja dhe nuk kam patur asnjë problem, ne miqtë tanë amerikanë i kemi vënë në krye të shtëpisë.” -tha Balla.
4 anëtarë të familjes Felaj në Prokurorinë e Tiranës
Përgjatë katër viteve të fundit, në Prokurorinë e Tiranës janë emëruar tashmë tre familjarë të deputetes Felaj. Në mars të vitit 2019, KLP vendosi të emërojë si prokuror në Tiranë përmes një procedure të diskutueshme bashkëshortin e deputetes, Bledar Valikajn, pa kaluar më parë procesin e vetingut. Vetëm pak muaj më vonë, në maj 2019, Prokuroria e Përgjithshme përzgjodhi pas një procedure konkurruese vëllanë e deputetes, Armando Felaj si oficer të policisë gjyqësore në Prokurorinë e Tiranës. Në mbledhjen plenare të datës 29 maj, u miratua projektakti për transaferimin e bashkëshortes së këtij të fundit, Alma Felaj, nga Prokuroria e Durrësit në atë të Tiranës.
Por nuk mbaron me kaq. KLP miratoi të martën më 27 qershor me 10 votat e anëtarëve të pranishëm projektaktet për renditjen e kandidatëve për tre pozicione vakante në Prokurorinë e Tiranës, ku në të tre rastet e para në listë u rendit prokurorja e Vlorës, Eranda Felaj.
Ajo është motra dhe familjarja e katërt e deputetes së Patisë Socialiste, Ermonela Felaj, e cila pritet të emërohet në Prokurorinë e Tiranës.
