Qeveria shqiptare i ka dërguar një letër zyrtare Ministrisë së Jashtme izraelite, ku shprehet se po rishqyrton vendimin e saj për të emëruar biznesmenen dhe këngëtaren izraelite Nicole Reidman si Konsull Nderi të Shqipërisë në Izrael.
“Ynetnews” shkruan se Reidman u emërua si kandidate për postin simbolik në fillim të këtij viti, por Ministria e Jashtme ka marrë tashmë një letër nga qeveria shqiptare për tërheqjen e kandidaturës.
Letra e Shqipërisë konsiderohet si një dukuri e rrallë në qarqet diplomatike, veçanërisht pasi një kërkesë zyrtare për emërimin e saj në postin simbolik i ishte bërë tashmë Ministrisë së Jashtme dhe e ngritur në një takim në Kryeministri.
Reidman është një mike personale e Sara Netanyahu, gruaja e kryeministrit Benjamin Netanyahu.
Një Konsull Nderi është një pozicion simbolik që i jep bartësit privilegje diplomatike dhe mundësinë për të përfaqësuar vendin e emërimit në ngjarje dhe për të promovuar marrëdhëniet midis vendeve.
